काठमाडौं । रसुवाको भोटेकोशी नदी हुँदै आएको बाढीमा परि फेला परेका शवको सङ्ख्या ६२६ पुगेको छ ।
गृह मन्त्रालयअन्तर्गतको राष्ट्रिय विपत् जोखिम न्यूनीकरण तथा व्यवस्थापन प्राधिकरणले दिएको पछिल्लो जानकारी अनुसार रसुवामा १३, नुवाकोटमा ५१, धादिङमा ४५, गोरखामा ४८, नवलपरासी पूर्वमा १५८, नवलपरासी पश्चिममा ४७, तनहुँमा ३१ र चितवनमा २३३ जनाको शव फेला परेको हो ।
अहिलेसम्म १२९ विदेशी नागरिकसहित चार हजार ४५१ जनाको उद्धार गरिएको छ । त्यसमध्ये जलविद्युतको सुरुङबाट १९१ जनाको उद्धार गरिएको प्राधिकरणले जनाएको छ । त्यस्तै बाढीमा परेर दुई हजार ४२६ जना सम्पर्कविहीन छन् । नेपाल प्रहरीका २७, नेपाली सेनाका ४५, सशस्त्र प्रहरीका १३, भन्सार कार्यालयका १५, अध्यागमन कार्यालयका चार जना सम्पर्कविहीन छन् ।
रसुवाबाट ५६२ र नुवाकोटबाट ११५ जना, मकवानपुरबाट ६५ जना सम्पर्कविहीन रहेको विवरण प्राप्त छ । त्यस्तै जलविद्युत आयोजनातर्फ ९३३ जना र विदेशी नागरिक १२७ जना पनि सम्पर्कमा छैनन् । लाङटाङ निकुञ्जमा ३ जना सम्पर्कविहीन छन् । १०१ जना घाइतेको विभिन्न अस्पतालमा उपचार भइरहेको छ ।
खोज तथा उद्धारको लागि १५ हजारभन्दा धेरै सुरक्षाकर्मी खटिएका छन् । बाढीको चौथो दिन आज पनि खोज, उद्धार र राहत वितरणको कामलाई निरन्तरता दिएको सरकारले जनाएको छ । खोज तथा उद्धारका लागि नेपाली सेना र निजी कम्पनीका गरी १६ वटा हेलिकोप्टर परिचालन गरिएको छ । तर जङ्गल र अप्ठ्यारो भूबनोट भएका ठाउँमा अलपत्र परेकाहरूको उद्धार हुन नसकेको गुनासो छ ।
