काठमाडौं । आज कोशी, बागमती, गण्डकी र लुम्बिनी प्रदेशका पहाडका साथै मधेश प्रदेश तथा बागमती, गण्डकी र लुम्बिनी प्रदेशका तराईका एक–दुई ठाउँमा ठूलो वर्षाको सम्भावना रहेको छ ।
वर्षाका कारण पहाडी तथा भिरालो ठाउँमा पहिरो तथा गेग्रान बहावको जोखिम बढ्न सक्ने भएकाले आवश्यक सतर्कता अपनाउन मौसम पूर्वानुमान महाशाखाले आग्रह गरेको छ ।
अहिले गण्डकी प्रदेशका एक–दुई ठाउँमा हल्का वर्षा भइरहेको छ ।
गएराति बागमती प्रदेशदेखि पश्चिमका विभिन्न क्षेत्रमा हल्कादेखि केही ठाउँमा ठूलो पानी पर्यो । महाशाखाका अनुसार पछिल्लो ६ घण्टामा बर्दियामा सबैभन्दा बढी ६३ दशमलव २ मिलिमिटर वर्षा भएको छ ।
यस्तै, देशका पश्चिमी पहाडका धेरैजसो ठाउँमा वर्षा भएको महाशाखाले जनाएको छ । पूर्वमा भने तुलनात्मक रूपमा कम वर्षा भएको छ ।
खबर बजार । २५ भाद्र २०८३, बिहीबार ०६:३४