काठमाण्डौ । नेपालका स्पिनर सन्दीप लामिछानेले यूएईका ब्याटर रोहन मुस्तफासँगको तस्बिर शेयर गर्दै मैदानभित्र आफूहरू प्रतिस्पर्धी र मैदानबाहिर साथी भएको बताएका छन् ।
आज मङ्गलवार सामाजिक सञ्जालमा मुस्तफासँगको तस्बिर शेयर गर्दै सन्दीपले लेखेका छन्, ‘मैदानमा प्रतिस्पर्धी र मैदानबाहिर साथी । रोहन मुस्तफा नेपालमा स्वागत छ ।’ सन्दीपले उनको नेपाल बसाइँको सुखद कामना पनि गरेका छन् ।
यसअघि हिजो सोमवार दुबई इन्टरनेशनल क्रिकेट स्टेडियममा खेलकै बीचमा सन्दीप र रोहन मुस्तफाबीच भनाभन नै भएको थियो । सन्दीपले ३५ औँ ओभरको बलिङ गर्ने क्रममा उनी र रोहन मुस्तफाबीच भनाभन भएको थियो । सन्दीपले त्यही ओभरको बलमा मुस्तफालाई एलबीडब्ल्यू आउटको अपिल गरेका थिए । त्यही ओभरको चौथो बलमा भने मुस्तफाले सन्दीप नजिक आक्रोश व्यक्त गरेका थिए । त्यसपछि दुई खेलाडीले टाउको नै जुधाएर भनाभन गरेका थिए ।
खबर बजार । २३ फाल्गुन २०७९, मंगलवार १९:५४