काठमाण्डौ । नेपाल र वेस्ट इन्डिज ’ए’ बिचको दोस्रो टि–२० क्रिकेट खेल आज हुँदैछ । यो खेल दिउँसो सवा १२ बजे कीर्तिपुरको त्रिवि क्रिकेट मैदानमा शुरु हुनेछ । पाँच खेलको टि–२० श्रृंखलामा नेपालले पहिलो खेल जित्दै १–० को अग्रता बनाएको छ ।
हिजो भएको पहिलो खेलमा नेपाल चार विकेटले विजयी भयो । वेस्ट इन्डिज ’ए’ ले दिएको दुई सय पाँच रनको लक्ष्य नेपालले १९ ओभर चार बलमा छ विकेट गुमाएर भेट्टायो । यो खेलमा नेपालका कप्तान रोहित पौडेलले शतक बनाए ।
टस हारेर पहिला ब्याटिङ गरेको वेस्ट इन्डिज ’ए’ ले २० ओभरमा पाँच विकेट गुमाएर दुई सय चार ४ रन बनाएको थियो । वेस्ट इन्डिज ’ए’ का कप्तान रोस्टन चेजले सबैभन्दा धेरै ७४ रन बनाएका थिए । वेस्ट इन्डिज ’ए’ को टोली पहिलो पटक नेपाल भ्रमणमा आएको हो । शृङ्खलाको तेस्रो खेल बुधवार, चौथो खेल बिहीवार र पाँचौँ तथा अन्तिम खेल शनिवार हुनेछ ।
खबर बजार । १६ बैशाख २०८१, आईतवार ०८:५८