दैलेख । आफ्नै घर नजिक सामाजिक सुरक्षा भत्ता बुझ्न पाएपछि दैलेखको गुराँस गाउँपालिकाका ज्येष्ठ नागरिकहरूले खुसी व्यक्त गरेका छन् ।
बेैंकमार्फत् सामाजिक सुरक्षा भत्ता हस्तान्तरण गर्ने नेपाल सरकारको नीति भएकोमा गुराँस गाउँपालिकाको बैंकको चाप, भुगोल, मौसम र ज्येष्ठ नागरिकको स्वास्थ्यलाई मध्यनजर गरि वडामै भत्ता हस्तान्तरण गरिएको हो । भत्ता वडा कार्यालयबाटै लिन पाएपछि आफू खुसी भएको गुराँस ८ का ज्येष्ठ नागरिक लालबहादुर गैरेले बताउनुभयो ।
“पहिला भत्ता गाविसबाट पाइन्थ्यो । संघीयता आएपछि गाउँपालिकाबाट दिन थाले, टाढा जानुपर्ने बाध्यता आयो । अहिले यहीँबाट पाइयो ।” उहाँले भन्नुभयो, “टाढाबाट गाडिमा जाऊ, रिङ्गाटा लागेको हुन्छ । चिसो मौसम, बैंकमा लाइन लाग्नुपर्ने । त्योभन्दा त यो धेरै राम्रो ।”
सुदुरपश्चिम प्रदेशको अछामदेखि कर्णाली प्रदेशकै जाजरकोट र सुर्खेतसम्म फैलिएको गुराँस गाउँपालिकाको केन्द्र (बैंक भएको ठाउँ) रानीमत्ता पुग्न ज्येष्ठ नागरिकलाई कठिनाई हुने गरेको छ ।
गाउँपालिका सरकारका प्रवक्ता एवं गुराँस ८ का वडाअध्यक्ष दीपेन्द्र ओलीले भन्नुभयो, “भुगोलमा मात्रै ठूलो होइन, समुन्द्री सतहदेखि २ हजार ३०० भन्दा धेरै उचाइमा रहेको रानीमत्तामा चिसोको कारण बुढा बा-आमाको स्वास्थ्यमा समस्या हुने भएपछि यसो गरिएको हो ।”
उहाँकाअनुसार ज्येष्ठ नागरिकहरूले वडाका जनप्रतिनिधि र कर्मचारीलाई मुञ्जुरीनामा दिएपछि बैंकसँगको सहकार्यमा रकम भुक्तानी गरिएको हो ।
गुराँस गाउँपालिकाले बैंकको घुम्ति शिविरमार्फत् वडामै सामाजिक सुरक्षा भत्ता वितरण गर्ने निर्णय गरेकोमा हाल बैंकको तयारी नपुगेकोले सबै वडा कार्यालयमार्फत् सहज बनाइएको गुराँस गाउँपालिकाका अध्यक्ष टोपबहादुर विसीको भनाई छ ।
गुराँसमा कार्यक्षेत्र बनाएको प्रभु बैंकको प्रदेश कार्यालय सुर्खेतले घुम्ती शिविर सञ्चालनको लागि व्यवस्थापकीय काम चलिरहेको जनाएको छ ।
सृजना बुढाथोकी । २७ श्रावण २०७९, शुक्रबार १५:२४