काठमाडौं । सहिद स्मारक ‘ए’ डिभिजन लिग फुटबलअन्तर्गत आज मंगलबारका खेलमा फ्रेन्डस र जावलाखेल तथा ब्रिगेड र च्यासलले बराबरी खेलेका छन् ।
फ्रेन्ड्सविरुद्ध ३–३ गोलको बराबरी खेलेसँगैै जावलाखेल युथ क्लबले रेलिगेशनबाट दबावमुक्त हुने अवसर गुमाएको छ ।
पहिलो हाफमै ३–० को अग्रता बनाएको जावलाखेलले अग्रता जोगाउन नसक्दा अंक बाँडेको हो ।
बराबरीसँगै जावलाखेलले ११ खेलबाट १० अंक ११औं स्थानमा रह्यो । यता, फ्रेन्ड्स भने ७ अंक सहित १३औ स्थानमा झरेको छ ।
यस्तै, त्रिपुरेश्वर स्थित दशरथ रंगशालामा भएको खेलमा ब्रिगेड ब्वाइज क्लब (बीबीसी) र च्यासल युथ क्लबले गोलरहित बराबरी खेलेका छन् ।
दुबै टाेलीले अंक बाँडेपछि रेलिगेशनको दबाव थप बढेको छ । खेलको निर्धारित समयसम्म पनि पाएका अवसरहरुलाई सदुपयोग गर्न नसक्दा दुवै टोलीले रेलिगेशनको थप दबाव झेल्नु परेको हो ।
जारी लिगमा १० खेलबाट २६ अंक सहित मछिन्द्र फुटबल क्लब शीर्षस्थानमा छ । लिगका पुछारका दुई क्लब भने दोस्रो डिभिजनमा घटुवा हुनेछ ।
खबर बजार । ३ फाल्गुन २०७८, मंगलवार १८:००